Ի տարբերություն ուսուցման ավանդական մեթոդի, նախագծային մոտեցման դեպքում ուսուցումը կատարվում է հակառակ հերթականությամբ։ Նախ ներկայացվում է խնդիրը, որն անհրաժեշտ է լուծել (օրինակ պլլանավորել նոր բիզնես, նախագծել գործընթացների օպտիմալացում և այլն), որից հետո ուսանողները պետք է փնտրեն և ստանան խնդիրը հասկանալու և լուծելու համար անհրաժեշտ տեղեկատվություն: Այս մոտեցման դեպքում դասախոսի դերը փոխվում է, նա ոչ թե փոխանցում է տեղեկատվությունը, այլ ուղղորդում է ուսանողներին անհրաժեշտ նյութերը ստանալ, հասկանալ և ճիշտ կիրառել իրենց առջև դրված խնդիրները լուծելու համար։ Ուսանողի մոտիվացիան այստեղ շատ կարևոր է, քանի որ եթե ուսանողը չկատարի առաջադրանքը, ուսուցումը կձախողվի։
Դասընթացի ժամանակ իրականացվող նախագծերը կարող են լինել ինչպես անհատական, այնպես էլ խմբային։
Անհատական նախագծերը օգնում են ուսանողներին ձևավորել ինքնուրույն աշխատելու հմտություններ, իսկ խմբային նախագծերի ժամանակ ուսանողները միասին են մշակում նախագծերը։ Նմանատիպ աշխատանքները պահանջում են ստեղծարարություն և այլ մարդկանց հետ աշխատելու կարողություն, ընդ որում միշտ չէ որ խմբի բոլոր անդամների հետ հեշտ է լինում աշխատել։ Խմբային նախագծերը սովորեցնում են ուսանողներին կառավարել իրենց, աշխատել որպես թիմ, բանակցել և շփվել միմյանց հետ:
Ըստ որոշ կանխատեսումների, ապագայում կրթության ոլորտում նույնիսկ հատուկ նախագծային ուսուցման համար նախագծեր մշակող և կազմակերպող մասնագետներ են լինելու։
